شمعة شتا

شمعة شتا عريانة دفيانةْ               واللـيل هجم وقلوبنا بردانــةْ

فوق قدرتي بَـرْدِكْ على بــردي       والضلمة عامــيانـا ولمَّـانا

لو قلـت دفينـي ما بترديـش           نص الدفا الناس اللي حَبَّانـــــا

اتغيرت م البرد همستنا               والشمعة جوه الضلمة سامعانا

وقلوبنا جواها الدموع ساكتـة          شايفـينها والَّا عـنينا عـيانةْ؟

* * *

والشمع زيّ الشعر بينوَّرْ ولا يدفِّي ...

والحب زيّ الشمع لا يشبَّعْ ولا يكفِّي ...

والعشق مش فارق معاه ضلمة المكان أو نورْ

العشق شيء واضح ومِتْخَفِّي ...

وخيالنا ع الحيطة بيترقص شَبَهْ عفاريتْ ...

نيجي كده

ييجي كده

عمره ما خانَّا في دِقِّة التوقيتْ ...

لو تنطفي شمعتنا من حبة هوا

حانبات أمانينا بقت فرافيتْ ...

شفتي الشتا قد ايه خبيث وحويطْ ...!