أمل مطلق

أَمَلْ مُطْلَقْ ...

مالوش دعوة بيأس الناسْ ...!

بيعرف يفرد الخطوة على السِّكَّةْ

ومش تنبل على الدِّكَّةْ

ومش معروض مع الأَغَوَات عشان حَبِّة قروش فكَّةْ

أَمَلْ مُطْلَقْ ...

في وش اليأس قافل بابه بالتِّرْباسْ ...!

* * *

أمل كدَّاب مع الكدَّابْ

أمل صادق مع الصادقْ

أمل بيجمَّع الأحبابْ

يردّ الظلم ع البادئْ

ولليائس يكون عكَّازْ

وللمحزون يكون إنجازْ

ولو ضاقت عَلِيهْ دنيا

يعيش مبسوط بلمبة جازْ

ومعجزتُه انُّه مِش إعجازْ ...!