نيشان

يا نيشان على صدر اللي يتعلم على صدورنا النَّشانْ ...!

يا نيشانْ
أنا دبلانْ
واللي بيتعايق بألوانكْ بقى يشبه بنات الليل بيتعايقوا كمانْ 
بالصبغة والألوانْ ...!
يا نيشانْ
أنا إنسانْ
عندي ضمير واحد وبسْ 
وباينِّنَا بنقرا في عَبَسْ 
اللي همس بالحق في السجن اتحبسْ

واللي صرخ
مشوي على باب اللومانْ 
أو صاده قناص من زمانْ
وبيحلموا نرجع لأيام العسسْ
والحلم من ريحته جَمَع دِبَّانْ
يا نيشانْ
أنا تَعبانْ
المشنقة مِتْجَهِّزةْ
لكن الغبي مش راضي ياخُد موعظةْ
والشعب جهز له الجِزا
وبدل ما يهرب بعد ما دبَّح ولادنا
جاي يعيَّط ويزاحمنا في العزا ...!
يا نيشانْ

أنا حيرانْ
اللي قتلنا وعمره ما اتجرأ يصوِّبْ طلقته لغيرنا
واخد نيشانْ ...!

في الطائرة إلى القاهرة 21/11/2013

8.00 ليلاً